Boleh tertawa pemuda yang kritis

1. DIBABA NI HEPENG GABE DIBABA NI DEBA

Hira na mintor adong do hamubaon masa dung dipatupa Op.Tulus partangiangan dibagasna, ai sataon dung na masa i masuk ma anakna tu Departemen Keuangan. Alani tung marsitutu do ibana pabotohon namasai tu donganna sapartungkoan., Mangihut tusi Sibonar anakhonnai sai diparhatutu do namasai holan alani tangiang do ndang alani bisukna dohot haboionna. Sahali sataon sai mulak do Sibonar papungu angka natua-tua, laho martangiang jala somalna diseat do lomok-lomok jala dilehon angka pasiuak natonggi ni angka dongan ni natorasnai asa mansai lasdo rohani natuatuai. Jala rodo natuatua dongan ni natorasnai mandok tanda ma napinaborhat ni tangiang Sibonar ai dibaba ni hepengido ibana di tempathon pamarenta.

Ala hira ganup taon do dipatupa Sibonar ulaoni gabe sai hira masisungkunan do natuatua molo jumpang dipartungkoan manungkun andigan do mulak tu huta tahe anakta Sibonar i..? Jala tung tangkas do sai dipopai angka ianakhonna, burju marsingkola dohot martangiang asa songon Sibonar hamu dibaba ni hepeng ditempathon gabe las roha ni natorasna dohot natuatua dibahen. Sandok gabe sada Maskot ma Sibonar di hutai nata pe dao do inganan ni tugasna di parserahan.

Dung hira sampulu lima taon, dung songon na holom bontar ma ari manang pungkul 19.00, hira na adong ma sada natuatua mamereng hirdop ni Sibonar di hutai, dipaboa ma baritai tu donganna sapartungkoan, ai songon na hubereng do nangkin Sibonar di harbangan ni huta mamboan tas..!. Alai ro donganna nasada didok ah napamerengmerengon do nuaeng ho, molo ro ibana pasti do mintor ro Op.Tulus mangontang hita laho marpungupungu, hape idama Op.Tulus pe ndang tarida, hape so hea holan ibana manigati na binoan ni Sibonari. Gabe sip ma natuatua napabotohon baritai.

Dung tolu ari adong ma muse sahalak natuatua mandok, imada toho do huroha dison Sibonar ai jumpang do hami di mual alai ait boha so ibana gabe so sanga masipangkulingan hami. Adong ma sada natuatua mandok tanda do naung matua hita, toho do sihol rohanta mamereng Sibonar, jala sai dilehon pasituakta, alai dang songoni be nian ninna. Alai ro ma nasada, alai imada nungga tolu ari ndang rap be hita dohot Op.Tulus, na boha do nuaeng naung marsahit do ibana..? Gabe sip ma sude nadipartungkoani. Alani betama jo ninna sahalak sian nasida tabereng jo Op.Tulus boasa ndang ro molo na marsahit do nungga maila hita laos so tabereng dope maila hita tu hutaon marsahit donganta dang taboto.

Udurma natuatuai tu bagasni Op.Tulus, dituktuhi ma dorpi ni bagasna, hape idama Sibonar do mangungkap pintui .Tarhatotongma angka natuatuai ai didok rohana naung sala nasida sude ai marsahit hape donganna pola tolu ari hape ndang diboto nasida. Sip ma nasida masuk tu bagasi. Di idama nungga peak Op.Tulus di paratina. Roma sada natuatua mandok bah nungga sala hami aleale marsahit hape ho ndang huida hami nungga songon na mardosa situtu hami , aha do sahitmu..? Mintor dungo ma Op.Tulus dung diida naung ro dongnna huhut perek iluna na rodo hamu hape..!. Bahen jo lage tiar ninna ma mandok Sibonar gabe dipatupama. Dung hundul nasida dipadasip ma panghilalaanna tu angka donganna. Imada Sibonar do na marsahit gabe dohot au ninna.

Dung hundul nasida didok Op.Tulus ma tu anakhonna Sibonar tole ma amang patangkasma ninna. Sai tumatangis ma Sibonar huhut ma didok hatana mauliate ma angka amang huingot do na borhat do au ianakhon muna sian hutaon hinorhon ni tangiang muna , dibahen Tuhan i do karejongku songon nasai laon dihatahon hamu dibaba ni hepeng do au mulaulaon, hape anggo uaeng nungga di baba ni deba be au, ai sai hupingkirima andigan au mulak jala ingkon adong parsituak natonggi muna angka natuatuangku saluhutna gabe korupsi ma ahu ninna huhut sai tumatangis.

Sip bedo angka natuatuai, manghilala nasida, na dohot do nasida mampanghorhon gabe di baba ni deba hape Sibonar . Adong ma sada natuatua mandok imada..alai molo boi asa denggan sude rap ma hita pasahathon ibana tu hupas jala tapabotohon ma sude napinatupana tuhita manang aha pe na masa unang holan rap mengkel hita alai donganna do hita uju rap tangis, gabe satolop ma nasida saluhutna rap borhat tu hupas pasahathon Sibonari. Dongan panjaha uli do nean sangkap ni Sibonar alai uang ma hira na mamaksahu manang gabe budaya i na hurang suman tabahen , intap ni natolap tapatupa ma partangiangan dibagasta nang parsaoranta alai ndang gabe manangko hita asa adong fasilitas unang hira alani gengsi dohot halak manghilala gabe hira na mardosa ala caranta na sala.
Poda16:18 Matua ginjang ni roha do patujolo ni hajepolon, jala hatimboon diri patujolo ni hatinggangon.






2.GAREJA NAULI


Hea do manghobasi huria angka na metmet hami taon 1995-1998 di Departemen Sending.Di tugashon ma hami songon koordinator Sending di Kepulauan Riau. Mansai las do roha hatihai mardomu tu bidang ni pelayanan ni olo ma samingu di wilayah pulau terluar ni Bengkalis, Dumai bahkan sahat do tu Malasya nang Singapore. Ai godang do nang suku laut gabe hasasahat ni Barita Nauli I.

Di sada pos penginjilan na baru, mansai torop do angka halak na mintor ondop ro jala marguru disi, sai tapatupa do marsijar marende tu angka dakdanak suang songoni manjaha dohot manurat tu natuatua dohot pingkiran asa gabe jolma napistar muse tu joloan ni arion.

Marsitutu ma dohot angka suku na disi didok nasida ma tabahen ma dihita sada inganan na tontu , asa denggan marsiajar angka dakdanak nang namatuape. Saut do rencanai sude ma mangalului hau bulat dohot tarupna sian rumbia. Mansai las ma roha ai arianna gabe sudema dakdanak marsingkola natape sakalas mulai marumur 6 sahat tu 12 taon.
Dung marumur 6 bulan roma angka usul ni natuatua na adong hombar tu hutai na kebetulan halak kita Batak, natoho marhau mambahen angka papan laho gadison tu Malasya dohot tu Singapura. Hinorhon ni lasniroha nasida gabe dituhorma seng dohot labang mintor dimposma antong sada jabu nabalga dipature nasida. Sude angka suku na adong diontang nasida patupa sada pesta jala didok adong do meja bangku lengkap jala diparade genset borngin dohot Televisi asa boi manonton angka natorop alai inghon disi do nasida marminggu dohot marsingkola. Las do roha ni angka suku terasingi, dituntut ma inghon disi mulaan parsingkolaan dohot parmingguon. Alai tadok ma alus dumenggan ma hita tontong di parmingguanta ala natapatupa sandiri doi marhite na adong dihita.

Bola dua ma jolmai, gumodang ma na laho tu parmingguan naimbaru i, alai gabe holan manonton TV ma suang songoni dakdanak,otik nama namandohoti parsiajaran di parmingguan naburuk, jala didok ma muse pandita na kolot, ketinggalan jaman dohot na asing. Ala sai martahan do di parmingguon naburuk gabe sogo ma nang rohani na manumbanghon parmingguon naimbaru i tu pandita namangula disi.

Sian naso panagaman dung hira adong 3 bulan ditangkup bea cukai ma pengusaha haui jala disita ma parmingguon naimbaru ala didok illegal logging ai dang adong hape ijin sian pamarenta. Deba mulak do dakdanak dohot namatua marsijar tu parmingguan naburuki jala manolsoli ma nadeba dung gabe taalap tu bagasna be asa rimpas sude marsiajar disi. Roma pandohan namandok memang ummuli do parmingguanta naburuki ala rap hita mangusahahon jala ndang na tinangko.Ai dumenggan do hita mambangun na dihita intap ni na boi tausahahon sian ias ni roha ganup.
Ulaon ni Apostel 2:46 Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon.

3. HOMA DIPATUA

Sada tingki di Sidingkalang rap udur ma Pandita dohot Sintua laho maningkir namonding , Somal do molo dohot seksi sai dohot do nasida mandok hata. Topet sitingkoroni nungga marumur 76 taon. Alani adong ma hata sian angka dongan seksi mandok mauliate ma tadok tu Tuhan ala naung matua do dipatua... dang sae dope hatai adongma sanduru mangalusi Homa dipatua. Tarsonggot ma sidok hata nang saluhut na dibagas jabui adong ma mandok pahohom hamu na diluari jo satongkin ai pas huria maracara dison. Alai mintor dialusi na sian luar ma, manang na huria manang na STM pei sandok unang didok hata mauliate di Tuhan ala na matua di patua, unang ala poso na mandok hatai gabe lomolomona, boha huroha molo naposo di patua Tuhani ninna muse. Hohom ma napaingothoni ala kebetulan ompungna do namangalusi na sian luar jala umurna pe nungga manjonok tu 90 taon.

Dung simpul na mangapuli disungkun Panditai ma namatua i , hape alusna namabiar dope ibana mate ido umbahen sogo rohana dung dibege hata mauliate ma di Tuhan ala namatua do dipatua. Didok rohana las do roha ni jolmaon hape molo mate au ninna rohana dibagasan. Alani taingot ma di namandok hata manang marjamita marmanat ma mangida situasi dohot kondisi unang maila hita, sasintongna dang na sala na mandok hatai, alai situasi ni namanangihon do naso dasip

I Tawarikh 28:21 Jala ida ma, disi do angka pargansion ni angka malim dohot halak lepi mangaradoti saluhut tohonan di joro ni Debata: Donganmu do huhut di saluhut ulaon sude halak angka na ringgas jala na pantas marroha mangaradoti saluhut tohonan, tole dohot angka induk ro di sandok situan na torop i girgir be patupahon hatam.



4. TUNGKOT JOM AMANI MALLOTOM

Dipatupa huria ma natal umum toho ditanggal 24 Desember, disagihon angka dongan parhalado ma angka ayat sipajojoron tu ganup ruas. Di patuma tingting asa ondop ma ro di tanggal 23 arianna laho latihan asa diboto parmasukna unang masisungkunan manang masionjaran di Natal i. Torop do naro ala sadar be .

Mardalan ma acara Natal denggan sahat tu acara namatua marlingkungan. Adong ma sian sada lingkungan manungkun tu protocol didia do parmasuk hu .Di alusi ma amang sasintongna nangkaning do hamu masuk, alai dia ma dongkonon nantoari pe soro hamu laho repetisi. Alai sai di gogohon amantai ma ingkon dohot ibana, alani unang gabe parsoalan gabe ribut Natal gabe didok protokol ma antong songonon mai dung salpu sian lingkungan IX amang ma masuk ninna. Masuk ma amntai sahalaksa ala nungga tarlewat hian parmasukna. Hinorhon ni gugup na mamereng jolma gabe sai hitirma dijolo , jomolo do didok amantai “ndang na morot tungkot..tungkot..tungkot huroha nungga lam maila amantai ujungna di torushon ma tungkot jom amani mallotom nabibi namalamun sitangkup gaol natata, laos mintor mulak ma amantai torus sahat tu jabuna sopola mamereng tusimun manang tu hambirang anggo na salelngon martungkot jala songon na lambat doidaon mardalan hape anggo tingkii sahira na marlojongdo, jala sanga do 2 bulan ndang marminggu .

Ni sungkun ma ahado dipasahat hamu pajojoron ni amantai gabe di alusima sian 2 Musa 49:10 Ndang na meret tungkot harajaon sian si Juda, manang paruhum sian holangkolang ni patna paima ro si Shilo, jala Ibana do ihuthonon ni angka bangso.


Angka dongan molo adong angka ulaon , hombar tu hatontuan taihuthon ma , asa unang hambar haburjuontai asa hot angka tumpalhatuaontai manang sadiharipe. Pangungkapon 3:11 Magira ma Ahu ro. Tiop ma na di ho, unang adong na mambuat tumpalmi!


5. DIBETLEHEM PANDITANAMI

Somal do adong angka sungkun sungkun dipatupa parjamita, asa unang hira na saarah komunikasi ni jamita laos songon na patangkashon bohado diparateatehon manang nyambung do jamita I hona tu naumbegesa.Dijamita di ari paskah adong masa pandidon sian parserahan holan sahalak alas an idope anak buhabaju manang panggoaran, somalna balgado pestai patupaon, diontang do nang hulahula nahombar tusi, dipatupa parjamita ma sungkunsungkun songon dalam behado tutu ringgas do marminggu diparserahan ruas namangido pandidioni manang dang, didokma didiado tahe tardidi Tuhanta Tuhan Jesus pinangido majo alus sian hula hula manang tulang ni nanaeng tardidi on . Ro ma alusni tulang mandok di betlehem panditanami . Mengkel suping ma parminggui, dohot ma panditai pe sai hira na mengkel suping.

Diulahi panditai ma muse tu natorasni na tardidi ia hamu didia do tahe tardidi Tuhanta Jesus , roma natorasni namamboan dakdanak natardidii dialusi ma dohot denggan, sintong do panditanami, di sunge Jordan do tardidi nahuboto hami Tuhan Jesus, alai ala nungga didok tungganei nangkin di Betlehem, ba naung di betlehem mai natape disunge Jordan ninna muse, gabe margak ma sude natorop namarminggui, Alai las maila ma anggo angka hulahulai,ala habotoan naso pola ringgas nasida marminggu.

Dongan panjaha, tohodo ringkot jala mansai arga do molo masipasangapan na marhula boru, alai ndang disude situasi patupaontai adong do tingkina mandok na tingkos natape hira na paet alai ujungna gabe tonggi do ai lam tu jamotna nang angka partuturan
Lukas 9:26
Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i.


6. MATE SUDE

Di Humbang nasae hira adongdo pandohan songon sintuhu ni ulaon uju adong na monding. Adong ma didok mangido tangiang dipamasa mai uju monding poso, molo dung monding jala adong anakhonna naung marhasohotan didokma partangiangan, alai molo naung ris do sude angka ianakhonna marhasohotan jala adong be gellengna, dipatupa ma ulaonmangido pasupasu.

Sada tingki monding ma nasaur matua jala judul ni ulaoni mangido pasupasu.4 gellengni amanta namatuai, jala 32 ma pahompuna.Dipatupa natuatua ma parrapoton so pola disungkun angka gellengni hasuhuton andigan partuatna . Las do rohani angka ianakhon ni namondingi ala kebetulan di parserahan do nasida tinggal , tangkas do diida godang ni panundur dohot maningkir amantai jala sai sude do hata hira na mandok martua ma tutu Op.Daniel on gabe ibana, sangap jala mamora, jomukjomuk nang pansamotan ni gellengna.

Ditingki ngoluna memang naringgas do amantai, adong do 2 pinahanna jala di sabi do duhut ala adong dipasabihon halak horbo tu ibana. Molo somalna dipasabihon horbo dung balga gadison do horboi jala upa panabi dilehon nampunasa horboi ma hombar tu untung nasida. Hape nungga mabalu amantai.

Anggo pamingkiran ni donganna natuatua, horboni amantai do horboi silehonlehon ni anakhonna doi asa adong daon lalapna.Alani do umbahen dipungka parrapoton so pola dipangido pandapotni angka gellengna.

Dapotma tingki di ulaon mansai sonang do idaon, denggan sude jala atur, gokma halak mandok tohoma naung mamora tahe naung mondingon jala sada rohani angka ianakhonna, gabe hira naso adong hurang diulaonon.

Dung hira 2 ari salpu ulaoni manghatai ma angka gellengna, ala mulak be ma hita tuparserahan, tauji ma marsagi angka pengeluaran tu ulaoni, alai dung tangkas dang adong pola dapot nasida, hira cukup do sinamot naro tu Musik dohot Video,diujima muse marsgi na pinungka ni natuatua i alai dung dipareso holan jabu ni natuatuai nama adong ugasanna, gabe sude ma mandok tole tu siampudan mai. Saut jala putusma panghataioni. Alani mandok mulak bema, alai tompuma adong manuktuhi pintu, dung diungkap dijalangi ma nasida, imada dang dison au 2 mingguon ndang huboto monding alealengki ninna, alai nungga sonang be rohangku ala jumpang dope dohot hamu.

Nahudok tu hamu ondo alani paralealeonku dohot amang muna, hupasabihon hian do horbo tu ibana, jala sude boras 45 kaleng na talompa diulaon pesta nasian kilangta doi, alani andorang so mulak hamu, ba tangkas ma jo garar hamu, horbo 10 juta, boras 4,5 juta pungu sude Rp.14,5i juta. Gabe sip ma sude gellengni amantai, ai holan ongkos ni nasida pe mulak tu parserahan paspasan nama, hape garararon dohape utang marpulu juta nai. Tangis ma sude gelleng ni amantai didokma mate hape amanta laos mate do hape sude, mate pinahanna,horbona sudema tahe mate korban ni adat mangido pasupasu mahita.

Dongan panjaha ondo naringkot ingotonta unang ma alani angka paradatan korban sude alai taaturhonma adat hombar tu lehetna unang alani ulaon gabe boban tu ngolunta
Matius 15:3 Alai ninna ma mangalusi nasida: Ia hamu, boasa laosanmuna patik ni Debata, paingotingot adatmuna i?15:6 Gabe disegai hamu do patik ni Debata dibahen adatmuna i.



7.Sol Sol Do

Huroha somal do diangka punguan ina na dihuta ndang pola diparsiajari not asa diendehon . Sae ma holan endei diendehon jala ditangihon angka ina ma. Bege hamu asa huendehon suara Sopran dungi didok ma muse begema asa huendehon suara Tenor songoni ma sude, memang tangkas unedo idaon ndang mamereng poto copy be tingki marende holan dirigen nama.
Sada tingki masuk ma pandita laho mangajarhon sada ende naimbaru, dimulai panditai ma didia suara Sopran martudu majo,. Bingung ma panditai ala soadong martudu. Roma punguan ina didokma amang dang huantusi hami sopran, nasomal hami diajari ima soara sada ihuthon hamu songonima tu suara dua,tolu.

Di uji panditai ma muse tole tamulai ma ninna alai tacoba sian not na adongi taida ma poto copy ni endei.tarsurat ma not na 5 5 1 0 0 . Roma punguan ina diendehonma sol sol do ow ow gabe hohom ma panditai, ai so hea hape not na jumolo diendehon patutma maol pas endei.

Atik beha deba sian hita adong na gabe drigent manang guru ni parende taujima asa sian not na parjolo tamulai ipe asa hatahatana. Asa tangkas gabe tiruan tu tingki nanaeng roMazmur 66:8 Puji ma Debatanami, hamu ale angka bangso, jala patubegehon hamu ma soara pujipujianna!

8 MARKUS

Paringkian parpudi on jotjot do habegean hata markus, sasintongna singkatannang makelar kasus doi, alai sipata dang pola diantusi jolma i. Di pesta Paskah dipatuma pajojorhon tu angka dakdanak singkola minggu songon nasomal . Sahalak sian nasida di pajojor ma “ Loas hamu ma angka dakdanak i unang orai hamu nasida ai diangka sisongonido harajaon ni Debata “

Huroha ala sai diulakulakhon anakhonnai dohot dibalian, disungkun natorasna ma dakdanaki, ai aha do dipandok ho ? dialusi dakdanaki ma surat ni si Markus doi bapa ninna mangalusi. Tarsonggot ma amantai bah gelleng dope ho nungga manjaha surat ni si Markus, didok ma tongka, ndang sijahaon bei, salangkon hami naung matua mabiar sotung gabe masuk penjara ho dung balga, sandok sahali nai hudok sombangku unang jaha bei.

Ditingki General Revetisi, disungkun dakdanaki ma guru singkola mingguna, ibu didok bapakku bahaya do ninna molo hupajojor simarkus alani ganti hamu ma jo liturgingkon . Heran ma guru singkola minggui ai marsogot nama pesta paskah hape saonari adong na mundur, alani di tangkasi ma, didok guru singkola minggu ma tole torushonma hami pe annon patngkashon tu bapa ninna.

Di patangkas guru singkola minggu ma tu jabu, patorangkon namasai alai sai martahan do amantai didok najolo do denggan surat ni si markus anggo nuaeng siluluan ni polisi nama, sai diusahahon guru singkola mingguima patangkashon anggo markus na dibarita TV, Koran, Radio i asing do sian si Markus on, ai molo simarkusi sitangkupon mai tutu, alai anggo si Markus on sihatindangkonon do ai asing do halakni ninna, markus malayu doi dang Markus Internasional. Hohom ma amantai lam diantusima namarasing do hape na dirimpu rohana do molo markus nuaeng nasohasea sude.

Dongan nahinaholongan, ingkon tangkas do angka sumber ni pangantusionta di bibel pe godang do didok debata alai adong do muse disurathon Debata, tontu marasing doi natape tulisan sarupa taingotma nanidokna di 5 Musa 8:5 Antong sai tandai ma i di bagasan roham marhatopothon, na niajaran ni Jahowa, Debatam ho, songon amaama na mangajari anakna.

9 BINDORANG DO HAPE

Bindorang ima sada binatang, na boi beradaptasi dohot hatop tu lingkunganna ,jala laos ido dalanna laho meyelamatkan diri tu musu naro, ai so pola gogo ibana mangalo molo ro ancaman. Alai hata bindorangon boi masa didok muse tu jolma molo mintor hatop ndang niantusan cara pamingkirionna.

Disada Pemilihan kepala daerah , dipatupa do somalna pamilliton tu angka natalup laho mangulahon angka parhobas isara ni Bupati, Gubernur dohot kepala Desa. Somalna sai di usahahon do adong angka tim pamonangkon sada calon. Adong ma marhite angka punguan marga, arisan dohot angka punguan na asing.

Di nanaeng masa pemilihani, mardalani ma tim pabotohon halobion ni halak nanidukungna. Sian angka tim namardalani tarida do tutu boha do parsitutuonna mandukung halak na ni huntina, hape godang do dung sae pemilihan, tarida ma si X do nean na binereng sai dijagohon hape si Z do nadipamonang, ai bindorang do hape angka tim sukses onninna na sai tongtong donganna na sai laon, sainirimpu do laho patuduhon holongna hape dalan laho maniaphon do.

Dongan panjaha jotjot do masai, di hata hira sai hita na porsea, na berjuang habishabisa, dohot angka hata na asing, hape sabotulna ise do natapeop.Jotjot hita Kristen marsoara nagogo mandok ingkonari libur do angka pesta paduahon isarani Paskah, Natal,Haroro ni tondi Porbadia,hape idama ise do namarkantori, nakarejo tu ladangna, martigatiga sian pangantusion natangkas 85% Kristen do hape na patupa angka ulaon rutinna, molo songoni naung bindorang do hita tadok, tatuntut libur alai justru hita sandiri do patupa i unang masa ah bindorang do hita hape.taingot mahataon Matius 5:37 Songon on ma hatamuna: Olo, anggo olo; ndang, ia ndang! Nasa na ganda sian i, sian na jahat do i!

10 UMPASA MODERN


Partingkian on nungga be tarida massamni angka ulaon, nungga gabe hasomalan be gabe adong di patupa acara adat uju Tardidi,Manghtindanghon haporseaon dohot na baru masuk tu sada perguruan tinggi, lulus sian angka parsingkolaan sandok ragam ma tahe idaon, ala ni ragamna gabe dohot do barisan ni pandita repot ai didok sintua lingkungan do di pangidohasuhuton amang jolopatupaon do partangiangan baru pe asa masuk tu acara adat,hape siapata so hea dope ulaon songoni dipatupa repot manian.

Uju masuk ma sahalak sian ruas ni huria mandohoti parsingkolaan program S3 tu Amerika, dipatupa ruas ni huria i jumolo partangiangan nahinobasan ni huria, Simpuli masuk ma tu acara marhata angka umpasa dalan manangiangkon nanaeng borhat asa hipas diparserahan jala ditingkina boi wisuda doctoral. Sahat ma giliran toho tu tulang ni nanaengborhat asa laos nasida ma pa ampuhonsa tu berenai. Dung didok hata gabegabe dohot horas horas didokma selamat menempuh studi ma bere berhasil maho bere di studi diurupi Tuhan ma ho jala ingot hami angka natorasmu mauliate. Alai roma paidua ni suhut, asa tung tangkas hulahula tangiang muna paborhat beremunaon baen hamu ma umpasai manggohi asa diampu nadenggani.

Hodohan ma nampuna berei aha ma bahenon umpasa taringot tu son ninna rohana,hape kebetulan pandita amantai, dung songon na leleng didok ma imada on ma umpasa paborhathon ho bere ” SiZakheus manjangkit hau galagala , ro ma Jesus di dok turun maho, alani molo dung ro Tuhan Jesus sae ma sude soada mara jala mulak maho” Immatutu ninna natorop huhut margak.

Dongan panjaha sasintongna angka nauli do umpasa jala laos dalan doi laho manangiangkon ulaon dohot rencana alai naeng manean mardasor ndang gabe si parengkeloni, ai gabe hmbar nang ulaon molo so ramot hita disi. Molo pe hurang hita diumpasa bai boi do tadok olatni majo hata sian hami, unang tapaksahon umpasa molo so apala talup taboto.

Dimasa nuaeng pe nungga lam dang diantusi sundut naumposo be muse umpasai ala sibahen pistarna be taringot tu umpasai, di daerah Riau nungga dohot be kelapa sawit di umpasahon marsogot aha ma muse taingot tong melestarihon adat dohot budaya naulii jala dimpos taajarhon tu sundut naumposo songon nanidokna di 5 Mus 6:7 Jala ingkon gogoonmu mangajarhon angka i tu angka anakmu, jala taringotanmu angka i, molo hundulhundul ho di bagasan jabum, manang mardalani ho di pardalanan, manang laho modom pe ho, nang dung hehe muse.

11. SIRAJA ADAT

Hosomalan nauli dope di hampir sude huria na adong di Tapanuli sai dipatupa dope jamita na jempek,ima hasomalan masa uju natal bodari dohot parmingguon parpudi andorang so taon naimbaru. Hira ganup taon doi dipamasa utusanni ganup lingkungan doi natuatua di paborhat, alai sipata olo do tong gabe dipasahat tu anak naro sian parserahan molopas dihuta nasida martaon baru.

Angka dongan namarjamita najempeki nungga dipabotohon ganup lingkungan hian, ise sian nasida. Sada tingki marsahit ma sian lingkungan Lumban Gambiri naung didaftarhon sintua lingkunganna hian , alani dipabotohon ma tu Guru huria, alai didok Guru ma,unang pola kosong husiphon ma tunatuatua sian lingkungan muna amang sintua . Ujungna di dapothon amanta sintuai ma natuatua sian hutana naung somal jongjong mandok hata diparadatan.

Sahat ma amantai dilanggatan inganan ni panjahaan tingting, jomolo ma didok alasanna boasa gabe nasida marjamita na jempek ala marsahit do utusan na sian lingkunganna. Dimulai amantai ma hatana ” Amanta raja dohot inanta soripada namarpungu di sibangandingtua ni Jahowa on ...” mengkel natoropi huhut marhusipi ai boasa siraja adat bahenon marjamita najempek ninna be., dipaima amantai jo satongkin , dung dibege songon na hohom diulanghon amantai ma muse hatana ” Jamita najempek dihita dibagasan borginon,ima sian pustaha ni si Matius bindu 6 ayat 33, songonon ma didok disi santabi , sai jomolo ma lului hamu harajaon ni Debata dungi tambahononna do angka ondeng di hamu . Astuanna Bintang na rumiris ombun nasumorop di rondang ni bulan , anak pe di hamu riris jala boru deak torop huhut sioloi Tuhan... ndang sae dope dipatulus amantai hatana dialusi parmingguima immatutu,olopolop gabe tarhatotong ma amantai huhut angka hitir alai las ditorushonma binsar mataniari sian hasundutan,poltak ma matani bulan sian hasundutan, nungga tangkas marsundutsundut hita masi pandohan manang aha nahurang tangkasma hita masipandohan imammatutu, ninna amantai laos hinsatma ibana sian langgatani dang diingot be mandok amen.

Dongan nahinaholongan, jotjot ndang rade hita di situasi naingkon siadopanta,molo memang tangkas dopersiapan na hurang dang pola sala hita mandok dongan majo II Korintus 11:7 Na mardosa do ahu, di na hupatutoru diringku, laho patimbo hamu, ala songon silehonlehon huboan barita na uli ni Debata, na hubaritahon tu hamu?

12 SITAU BEGEON

Natumabo diportibion ima molo boi do tangihonon ni dongan kita uju manghatai.Jala nuaeng nungga sahira sahit bei. Denganmanang so denggan pe hatantai ingkonbegeon ni halaki, jala memang adong do pangkilalaan pandapot dohot ulaonta ma nean na sintong.

Adong dopiga dongan pandita naung pensiun, hea do deba sian nasida sanga Praeses dohot angka kepala Biro. Binoto do tangkas prestasi nasida tingki aktif memang mansai salut do angka sundut naumposo. Gabe songon guru do tahe nasida dipatupa angka pandita. Disada rapot Huria dung gabe ruas nasida jala dohot anggota rapot , dipangido pandita ma pandapot nasida didok ma ” songonondo pandita nami, anggo hami najolo ,........... dipatorang ma angka naung hea niulana, dohot prestasina. Sampe 3 jom.. alani ingkon songonido patupaon muna.

Mulai ma marhusipi angka deba sian dongan na marrapoti, tingki reses rapot nisungkunma anggota parrapoti ai beasa songon na marhusipi hamu, ima da amang ninna ai hea do nasida dison pandita, bahkan praeses alai di boto amang do, molo marjamita amantai mansai lambok ma sahat tu pusupusu, alai dung sun marjamita sai holan hepeng do disungkuni,gariada tahe dohot inantai holan naribut do ganup ari, masilelelelean hira film india, laos bereng amang ma annon simpul mangan sian rapoton manigor mulak mai, dohononna ma tole torushon hamu majo rapoton ate ai holan pingkiran do sian natuatua ba gogo sian naposo, alai laos nasida do annon manghatai di lingkungan ndang adong haputusan ni rapoti, dohot do au marrapot.

Toho ma tutu dung adong hata masuk ma hita asa tauduti parrapoton, mintor parmisi ma nasida muli, tolu bulan nai binoto ma muse sude hasil rapot huria didok ah ndang songoni hasil ni rapot, songonondo dipatorangma mansai lambok begeon, alai holan sahalak pe mandok ndang songoni amang ninna migor mulak do panditanta na pensiuni.

Lam leleng lambinotoma memang naung sahit do hape sian najolo, holan sitau begeon do nasida, asal adong hape manghatai ndang porlu tangihonon, jala sude naniula ni donganna sala sude holan ibana do nasintong , boha tutu songonido nuaeng ahu holan sitangihonon do ala soboi interupsi jamita songon sidang na di DPR an molo boi nean ate molo boi hita manangihon suara ni dongan ido nanaeng si parsiajaran ate anggo laho sitangihonon do naung somal doi songonnanidokna diYakobus 1:19 Ingot hamu ma, angka donganku na hinaholongan: Ganup jolma, girgir ma ibana mananginangi, bangkol ma ibana mangkatai, bangkol ma tarrimas!

13 PARTAMBA TAMBA

Gok do talenta di lehon tu hita jolma, adong do napistar di pertanian, di sikola, partigatiga. Siballuk ima goargoar ni sahalak sintua di Siborongborong. Mansai jago do nasida bagian maretong, molo ni sungkun amang sintua ise do na godang tommatna, mintor hatop do alusanna, sia polan amang nari selasai 300 Kg ma tommat digadis, tu ari selasaonpasti doi paling otik 450 Kg, jala habis annon tomatnai Rp.12juta ma hasilna.

Longang do namanungkun nasida sipata, diboto do tangkas anakhonnise naro sian parserahan,jala sadia hepeng dipasahat tu natorasna, suang songoni angkabarita na asing tahe.Alani longang ni roha,nasahali husuba hami ma naeng mardiskusi tunasida borhat ma hami dohot Guruhuria tu bagasna, Nisungkun ma dohot denggan, sian dia do dibotoi hamu amang, si polan na saon cabe na, si anu nasaon sayurna dohot lan na asing dope. Bah sai murai amang pandita, holan di parkopi asli hamu hundul sadarion mintor botoonmuna doi, ai disido nasida maretong dohot tongke.

Antong sian dia diboto hamu na sekian untungna, bah ima naummura amang, ari selasa adui nasaon, ari selasa an nasaon ba pinapungu mai. Bah seganai na holan mamerengi angka na lewat do hape amantaon holan ido ulaonna arian borngin dohot martambatamba, ai sohea dietong halojaonni jolma na lewat, sadia modal tu suansuanan asa boi songoni hasilna, ujungna laos soboi dioruhon. Gabe ni sungkun ma muse antong hamu sadia ma hasilni naniula muna, sip ma amantai ai so diboto marmorumoru, ujungna nietongma tiap ari 2 galas kopi Rp.5 ribu, sigaret GF 2 bungkus Rp.15.ribu indahan mangan siang Rp.10 ribu, laos nidokma anggo hamu amang sadari penghasilanmu minus Rp.30 Ribu, sataon minus Rp.10.800.000 antong gumodang do hasilmuna sian dongan na nietongmunai, mulai siani gabe adong ma hamubaon niamantai ndang sai holan namartambatamba be nungga be diboto marmorumoru,di urupi nama inantana tu balian Kolose 1:6 I ma naung sahat, nang tu hamu, nang tu liat portibi on; na marparbue do i jala lam ganda, suang songon na di hamu, olat ni dung dibege jala ditanda hamu asi ni roha ni Debata di bagasan hasintongan.


14. MANGALULUI PANGUNSANDEAN

Mangunsande ima sada hasomalan , hatiha hundul pe isara di ladang sai jomolo do talului pangunsandeanta.Sasintongna tu nahundul dohot tu najongjong do hataon alai nuaeng nungga sahat tu namartondong didok mangalului pangusandean.

Dongan panjaha, mangaririt naumposo,alai pangariritan do natuatua . sai somal do didok jolo boan jo tuson asa tinanda nanaeng parumaen manang hela.Alai dimasa ni face book nuaeng godang do masa angka pangotootoi .Simalum sahalak naposo bulung naburju, sai manghatai do ibana taringot tu calon na, didok 3 bulan nai ronama pangoli laho marhata sinamot, sekaligus martumpol.

Sai ditangkasi namarholongni roha do nean beha nungga hea jumpang hamu,alai dialusi ma nion gambarna, songonon karejona dohot angka na asing naboi digambarhon. Natorasna pe idaon mansai las do rohana, ai nungga boi be pangunsandean nanaeng tondong, ai hela i pe kontraktor do.

Dung 3 bulan roma tutu pangoli dohot natorasna, dipatupa ma partumpolon, alai didok anggo pesta di jakarta do. Las do roha ni natorop, sai didok tuani si Malum ninna, sai nirimpu hian nama dang muli, hape gabe tangkas do hamuliaanna.

Sahat ma simalum di Jakarta, tarsonggot ma ibana mangida na masai, kontraktor ninna hami natorusdo simatuana mangkontrak. Tohodoi molo mangkontrak jabu torus kontraktor do goar ai tukang kntrak ma tutu. Sai tangis natoras ni si Malum, alai maila ibana, sai di rimpu hian do boi pangunsandean hape gabe mambahen sande do dangolnai. Matius 24:45 Asa didia do naposo haposan jala na marroha, na pinabangkit ni indukna mangalehon angka naposona mangan di tingkina?


15. MUBA ALA NI TANGIANG NI DAKDANAK

Tarlambat sahalak ama mandohoti mangan sore ala nungga antar leleng dipaima ndang mulak dope. Nungga pas martangiang didapot amantai pas topet siampudanna marumur 7 taon namartangiangi. Tuhan asima roham di bapa nungga tung loja patupa panampangan ni kol nami,sampe so mulak dope ombason pasupasu ma suansuan nai, asai dalanMu manumpahi ngolu nami.

Borngin nai busisaon ma amantai di jabu, dang modom mamingkiri tangiangni anaknai. Alai pingkiranni inantai dohot gellengna alani loja ni amantaido umbahen naso modom.

Marsogotna manogoti, nungga sahat amantai di Koperasi ni huria laho mamimjam hepeng, hape sian data naung adong minggu nasalpu dope mamimjam , alani didok pengurus ma ndang boi. Diparrohahon amanta pandita ma namasai, dijouma amantai tujabuna boasa boi songoni .

Sai tumatangis ma amantai paboahon, toho do 2 ari naung salpu dijalo amantai manuhor bibitni kol alai lalap ma amantai dikode gabe habis ma hepengna, mulak ibana mabiar pabotohon namasai tu inanta, gabe paula dikarejohon ma panampangani ,dilojai amantaima dirina sampe mulak botari, dikarejoi ma haumana sahira panampangan di bahen hape soadong dibibithon manang aha disi. Anggo pingkiran ni amantai hian mangangkali inanta nama dohononna hian ma dung 2 minggu ndang hasea tampang ni kol natinuhornai ai soadong natubu nanggo sada.

Sintong ni namangolu,dioloi amantai do loja holan laho manutupi dosana tu keluargana , dang didok jujur naung sudado hepengi ai tu sipanganon do dituhorhon, alai umbege tangiang ni anaknai gabe manolsoli ma ibana, sai diingot ma pasupasu ulaon ni bapa nami , hape aha pasupasuon ni Debata so adong diulahon asingni mangangkali inantai.

Diboan pandita ma nasida tu bagasna di patorangma tu inantai sude pangangkuan ni amantai huhutma dipopai asa muba amantai tu ari nanaeng ro. Yakobus 5:16 Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon.

16 .NGOLU NI JOLMA

Mula ni panompaon adong do ilustrator mandok songonon, dung ditompa jolmai, mintor di tota do umurna, didok Tuhan ma, ale jolma songon umurni horboan ma umurmu, alai didok jolmai ma, molo boi Tuhan tambahon ma umur ni herekan dohot pananggaan, asa adong hasurunganku sian angka pinahan on, ai tu ahu do dipasahat Ho laho mangarajaisa.

Ditolopi Tuhan do pangidoani, alani do tabereng ma intap umur ni horboi 65 taon loja ma jolmai mula ulaonna songon horboi, ido umbahen 65 taon pensiun ni pandita loja ma , dung lewat umuri, songon herekma garut-garut, mambahen siparengkelon dohot mangalului hutu ni pahompuna songon umurni herek ma umurna gabe siparengkelon ni pahompunai 10-15 taon, dung lewat siani, songon panangga ma ibana, sijaga jabu holan na hundul nama ala nungga stoke manang linglung, dang morot be sian jabu.

Dongan panjaha hira na sogo do roha, alai hira tarsongoni do antong tarida ngoluni jolmai, boha do hita tahe songonido loja mangula, siparengkelon ma muse , simpuli gabe sijaga jabu ndang boi meret, rutinitas do hape ate nata pe tangkas do nean sangkap ni Debata manompa jolma Yeremia 29:11 Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna. Ba molo so setuju hita disi adong dope tingki taubama ngolunta.


17 HOLAN HATA DO HAPE

Somal do ditiap Desa adong Petugas Penyuluh Lapangan angkatan ni pemerintah daerah manang pusat, na langsung niangkat Departemen Pertanian.Godang do masalah pertanian nalangsung boi sungkunghonon tu nasida sian holtikultura manang perkebunan, jala tangkas do tahe alus nasida begeon, puas do nang angka dongan partanii ai dilehon nasida do nang tingki langsung ro tu lahan pertanian na be, disosoi do asa adong pembentukan ni kelompok tani. Diantusi nasida do mulai pembibitan sahat tu penanganan pasca panen, uli ma tahe.

Hinorhon ni angka hinauli ni parsaoran dohot angka PPL sipata lao doroha ni partani asa praktek langsung nean marnida lahan ni angka par PPL , dohot tujuan marguru langsung ma partanii sian mulai panamean, pemeliharaan sahat tu panen. Marhusip ma angka partani, sada ma roha nasida laho tu lahan ni PLL

Tarsonggot ma angka partani diidama najorbutan lahan ni PPL nasida cabe do disuan alai karitingon sude,hape lurus do jambulan ni PPL , gabe songon namaoto ma angka partanii, ai holan hata do hape anggo praktekna ingkon manungkun do hape PPL tu partan. Dongan panjaha, boha do hita adong do deba songoni pandita hape parhosom, murid hape so hea marsiajar taingotma Yeremia 44:25 Songon on do hata ni Jahowa Zebaot, Debata ni Israel: Hamu dohot jolmamuna, pamanganmuna sandiri tahe mangkatahon laos tanganmuna mangulahon songon on: Ingkon sai patolhasonnami do bagabaganami, angka naung hubagabagahon hami, ingkon manutung daupa tu raja boruboru di langit i dohot mangusehon tuak tangkasan tusi! -- Datdati hamu ma mangkajongjongkon bagabagamuna i dohot patolhashon bagabagamuna!

18 ISE DO PARDIJABU DIHAMU

Adong do pandohan pardijabu di halak batak mansai sangap do pandohani, ai pardijabu lapatanna natading dapoton di jabu mai, somalna ina doi didok angka namangantusisa. Di jabu do gumodangan tingkina, manunsi, mangalompa, manjaga dakdanak dohot paturehon jabu.

Alai nungga tung marasing pangantusion anggo partingkian nuaeng, berengma di Sibolga, ina do parkerejo bangunan amanta di jabu marorot, idama di Humbang, Toba, Samosir dohot Silindung ina do manarui kompos,marbabo, panen amanta dipaula marorot hape manjaga lapo do sahat tu botari, mambahas politik, markus dohot barita niportibion.

Antong molo disungkun ise do pardijabu dongkonon ma amanta do, hape taingot do uhum na tatanda gabe pasupasu ni Debata tu baoa ,ingkon hir hodokmu manarihon sipanganonmu , hape partingkian nuang gumodang do hir hodok ni amanta uju mangaltup, hir hodok na uju mangaremengi inanta naung loja sian balian ala hurang hatop masak silompaon, boha hamu dongan ina, molo songoni nama angka pangalaho ni amanta, tangonanan tungkar tambahon hamu ma tu beko asa adong mangurupi hamu manggangkat kompos, ala amanta so tarharaphon be, manang tatangiangkon ma hatop gabe kompos amantai asa ripe manaburhon hita tu ladangta. Setuju do hamu.






19 NAEK HAJI AMANTA PANDITA , MANDIDI AMANTA HAJI

Di daerah Dumai mansai denggan do parsaoranta dohot angka parugamo muslim, olo do hira namarsermon hita dohot nasida manungkun taringot tu Nabi Isa. Ala ni tabona tahe olo do sipata nasida dohot papungu dana tu Sending na adong di kepulauan Riau.

Sada sian donganta sian muslim adong do halakna mansai ganjang 190 Cm timbona, jala molo mardalan sai hira dakdanak do donganna na mardalani idaon. Dung hira adong bantuan dapot hami tu pulau laho ma hami mardalan, manaripari aek somalna jempek do aeki, alai ala kebetulan pasang naek hira 150 Cm ma bagasna . Asa unang matonu bantuan na taboani ro donganta silomi huompa ma hamu amang pandita , diompa ma hami sahat tu ujung ni sungei , dung sahat tu topi hudok ma patut ma olo hamu naek haji, ai tabo do hape na naek haji ningku margait ala memang haji do amanta moslimi.

Mulak sian pulau i ro ma dongan muslimi huompamaho muse , denggan unang pola maraek sipatu ninna roha, hape tompu di tonga ni sunge di dabuhon amantai ma,jala di patoltol tanganna, huhut di dok tabo do hape mandidi pandita, patutma las rohamu mandidi ninna huhut margak ah sai na adong do tahe angka ulini pardonganon gabe naek haji pandita, Galatia6:9-10 a Alai unang marnaloja hita mambahen na denggan, ai na manggotil do hita muse di tingkina i, anggo so pargale hita nuaeng.6:10 Antong, binsan sadihari dope, taulahon ma na denggan di saluhut halak,

20. NUNGGA RO HAMA

Hatiha mahasiswa sekolah teologi jotjot do marbola dohot marvolley singkola pandita dohot singkola pastor manang STT-HKBP Vs STFT di sinaksak. Mansai tabo do tahe berengon molo masionjaran angka parbolai, ai sai ni bayangkon do pastor dohot pandita masionjaran.tangkas do dohonon uju marbola kaki jumotjot do nasida monang, ala godang do nasida sian Indonesia sabola timur pir simanjojakna jala ndang di boto loja.

Hatiha marbola Volley, hubahen hami do sada angkal na jitu, sai dohot do huboan hami do angka mahasiswa parompuan mangalehon semangat ido mambahen gabe songon na gugup nasida jotjot di smash gabe tu luar,gabe jotjot ma talu nasida.

Sada hasomalan uju manonton parbola adong ma nean snack dohot minuman ringan, alai ala godangan napaspasan do kiriman gabe antajau dohot coklat na jonok tu lapangan bola i sai ni pambuat asa songon natabo manonton na marbolai. Ido mambahen asal ro ma singkola pandita tusi ro ma singkola pastor didok nungga ro hama, ai gabe sega coklat dohot antajau,suda borasna jala ndang adong pembasmi hama na boi mangambati,ndang tarbasmi,jala ait boi hian di basmi ise be pandita ni angka gereja protestan di Indonesia ate .alai pos do roha hama hian nungga gabe anti hama nuang gabe pangubati unang masa be sahit he..he Yehezkiel 33:19 Jala tung sura mulak roha ni halak parjahat i tumadingkon hajahatonna i, jala diulahon uhum dohot hatigoran, ingkon mangolu ibana alani.

21. HITA DO DEBA PATUPA KORUPSI I

Nungga tung dengan demokrasi mardalan di Indonesia, godang do hamajuan,nungga lam barani masyarakat mandok sidohononna. Dang holan dipemerintahan, di huria pe nungga tarida demokrasi, na parjolo rapot parhalado do di huria, nuaeng rapot huria nama.

Hombar tu namasai, masa ma pesta Jubeleum 100 taon di huria, di ontangma pamarenta setempat manang Bupati/ Walikota sipata sahat do tu Gubernur. Jala nungga hasomalan molo adong pesta huria mangalehon sumbangan do pamarenta daerah.

Dinasahali ala ni demokrasi laho do hami audensi tu kantor ni pamarenta, patangkashon pembangunan ni dalan , di palangkat ni dalani tangkas do disurathon ganjang dohot bidang ni dalan sibangunon. Alai dung ni ungkur dohot angka dongan rupani, sian bidang na adong moru do 10 Cm. Memang otik do naso disi, alai molo ni halihon hali sekian kilo meter bah ndang niantusan be.

Ditingki audensi hupasahat hami laporan najumpang di pembangunan dalan na moru do 10 Cm bidangna. Parjolo sip do parpangkat na hujumpangi hami, alai dung leleng didok nasida ma. Amang pandita toho do alualu muna na korupsi do tutu sipature dalan na nilaporhon muna, alai on do nanaeng si pasahaton ku tu hamu sude.

Adong do 563 gareja, 98 Ressort di kabupatenon, on ma gombaran ni APBD , adong do Rp.160 Juta dana sosial sataonon, hape bulan 6 dope nuaeng nungga 210 gareja dohot 3 Ressort naung marpesta sude do mangontang hami, jala ndang na ro boti hami , hulehon hami do sumbangan sian pemerintah godangna Rp.20 Juta, molo hurang marungutungut do panitia, alani holan na tu gareja Rp.4.260.juta ma, antong sian diama bahenon nami manutupi, molo ingkon denggan mardalan sude.

Mauhom ma sude na dohot audensii, ai gareja do hape deba mambahen adong angka korupsi, ai dipaksama asa adong lehonon tu gareja moru ma bidang dohot ganjang ni dalan, moru ma nang angka kwalitasna, jorbut nai ate. Alani adong usul molo boi unang pola taontang pamarenta molo adong pesta di huria bah asa boi gareja mangalehon panurirangon tu ibana, jala molo torus dope songoni taingot ma dohot do hape hita manegai dalani. Najumorbut dohot do hape hita patupa asa masa korupsi i ah muba be ma so ni ontang pe pamarenta ndang gabe hurang lapatan ni pesta, ai napasangap Debata do pesta ndang na pasangaphon jolma manang ise pe. Yeremia 5:3 Ale Jahowa, * nda tu hasintongan do matam laho? * Nunga nian dilinsingi Ho nasida, alai ndang mangilala nasida disi; nunga nian disiaphon Ho nasida, tong do nasida manjua manjangkon sipodaon; tung umpir do bohinasida sian dolok batu, manjua do nasida paubahon rohana.


22 HAMULIATEON NA MANGKARAT

Mansai tabo do hata mauliate, apalagi mahamauliateon , ala adong angkup ni hata mauliatei. Somal do di huria hamuliateon goarna. Nadeba huria digoari do hmuliateon tu huria,pandita,guru,sintua,seksi,pembangunan dohot angka na asing.

Sada tingki adongma napasahat hamuliateonna, dibahen ma parsagini hamuliateoni, tu huria Rp.50.000, tu pandita Rp.500 000, tu guru Rp.25.000, tu pembangunan dohot tu seksi Rp.50. 000 be. Tingki manintingkon gurui dang pola adong persoalan, alai di minggu na ro muse adong ma, sian ruas na adong hubungan ni partuturon tu guru mangalehon hamuliateon, tu huria 50. 000, tu pandita Rp,10.000 tu guru Rp.100.000 tu pembangunan dohot seksi Rp. 10.000. Ribut ma parminggu, adongma mandok nungga balas demdamon.

Sadalan ma rai dohot angka lelang, sasintongna dang sipamasaon be di huria marlelang. Ai marlumba teal do, molo balga lelangna Ephorus ma pasahathon las olo muse hape, sipata so margarar i songon na adong binege sahalak oknum camat taon 78 an di daerah TAPUT juara lelang sai mangalelangi alai ndang hea margarar ,di naasing muse molo gelleng do argani lelangi guru sikola minggu ma mangalehon . sahira lawak do tahe idaon sipata di huria ate. Gok angka siprengkelon.

Denggan hian do hubungan ni guru dohot pandita, alai alani angka hamuliateon nungga sahira naso sadalan be idaon, mungkin ndang alani mambahen ala masibuat ulaonna do alai anggo ruas mandok ndang masiantoan guru dohot pandita ala mangkarat hamuliateoni.

Dongan saluhutna mungkin gait doi ate, alai boi masa doi gabe sega nang huria, alani usul molo adong hamuliateon tu huria ma sude dang tu halakna, ala tapatupa pe hamuliateoni laho pasangaphon Debata do, ia soi tupelean ma tabahen, ai dang pola botoon ni halak hita mandok mauliate , botoon ni Debata doi. Ayub 12:22 Ibana papatarhon angka na buni sian haholomon, jala diboan do tu hatiuron linggoman ni hamatean.

23 MARHAMUBAON

Marlanggar ma sahalak dongan namora alai siholit bangkeng ( holit mangging situtut) , pola do koma sampe 2 minggu, dung sadar ibana sian na koma, ditangiangkon ma tu Tuhan, molo malum au Tuhan muba nama au lehononku ma nadumenggan tu Ho.

Hira saminggu, dung mulak sian Rumah Sakit, laho ma ibana parjolo operasi plastik, gabe bontar ma pamatangna sian na birong hian, laho muse ribonding palurushon jambulanna gabe uli situtu ma tahe idaon,ai salibonna pe nungga tung marasing sian naparjoloi dang tandaon be . Jala dung simpul angka ulaoni didok ma Tuhan nungga muba beau, nungga naumbagaknai be rupangku intap ni naboi hubahen.

Sataon dung namasai, marsahit mansai posi ma muse ibana ai gabe infeksi ma pamatangna, alani operasi plastiki, gabe didok ma muse ditangiangna, Tuhan nungga tung muba situtu au, birong do au ditubuhon dainang, saonari nungga bontar,huusahahon do bagak angka parsurionku, sude do salon dohot mandi sauna hudalani,program diet dohot fitnest do au manjaga asa torus fit penampilanku, aha dope nahurang nahubaen Tuhan asa urupanMu ahu.Intap ni nama nahuboto Tuhan. Mungkin mengkel do ra Tuhan ate ai so hamubaon ni pamatang na ringkot di Tuhan, tung roha parbagason do.
II Petrus 3:9 Ndang dipagele Tuhan i bagabaga i, songon na nidok ni roha ni na deba; alai lambas do rohana mida hamu, ai dipangido rohana, naeng unang ma nian mago agia ise, naeng ma tahe saluhutna sahat tu hamubaon ni roha.
24 DIPORPORI NASO PIRANA

Hea do tarbege suara hatiha rapot Praeses dohot Parhalado pusat di tingki nasalpu pandohan diporpori hamu do naso piramu, sahira namandok diulahon hamu na so talup siulaon muna.

Hinorhonni lao do roha , molo di peternakan lokal, somal do dipatupa, manuk mamorpori pira ni bibi, jala ndang pola diparrohahon manuk tolorna doi manang daong. Molo pira ni manuk biasana 21 ari do, hape pira ni bibi 28 ari pe asa manotas ndang gabe ditinggalhon manuk pira ni bibi . Dung manotas dang gabe tarsonggot manuki mangida na haruar sian panotasan, alai tung diajari do hombar tu naboi di patupa, jala molo ro anakni manuk naasing rupani na hampir sarupa umurna dohot anak ni bibi i, ndang gabe tinggalhononna anak ni bibi, ido tahe dietong gabe anakhonna, sipalbagaon jala sijagaonna sahat tu naboi sirang mangalului sipanganonna dohot manjaga diri.

Lobi songoni do roha ni Debata di portibion,di pasupasu jala diurupi do hita natinompana, so pola mardi imbar di bahen,natape di jolma adong klasifikasi dohot angka hatontuon di Tuhan dos do sude di pabalga do dibagasan holongNa sahat tu nataboto mangalului naummarga di ngolunta. Roma 2:4 Tung na hu do roham di denggan ni basana na godang i, di panganjuonna nang di lambas ni rohana? Ndang diboto ho, habasaon ni Debata naeng manogihon ho tu hamubaon ni roha?


25. HOLAN SADA DO NASOLANGKU

Sada tingki lewat do parsegasega ( botot ) didiori do sude nasega manang bekas pangke, boi doi bosi bosi, plastik, kaleng marmassam ma tahe. Idaon do angka barang na segai buruk alai dung proses daur ulang gabe angka barang nauli do muse jala denggan pangkeon.Disungkun ma angka jolma na binolusna, adong segasegamu amang/inang, somalna dialusi do adong manang ndang. Alai di hatiha dilewati amanta parbotot ma angka naposo, disungku ma muse, adong segasegamu..? Dialusi angka naposoi ma adong, laku doon ninna huhut ditudu donganna, tarhatotong do sanga amantai maksudhu barang nasega do ninna. Ah nahurippu hami do laku jolma nasega, dang holan hudon nasega, hape anggo jolma nasega ndang laku hape ate. Burju do amantai didok ma imadah sude do nean barang nasega laku, holan jolma nasega do nasolakku.

Songoni do nang hau nasega, bengkok alai dung di press boi do muse gabe angka barang na arga. Hape boha ma molo jolma nasega tu dia ma langkui alus gabe kompos ma dung mate di bahen ma gabe kompos ni hariara. Sai di gombarhon do jolma na sega songon lapung. Eme do nian alai ndang marisi, gabe tudiama, sipadomuon ma tu sobuon situtungon ma gabe kompos, dang tarpature bei apala gabe dodak asa adong tu pinahan.

Sai arga panobuson ni Tuhan hape adong do hape jolma nasega, jolma nasega ndang rupana manang pamatangna tung rohana do sega nai ate. II Timotius 2:25 marlambok ni roha ma maminsang angka na mangalo, anggiat dilehon Debata tu nasida hamubaon ni roha, laho mananda hasintongan,


26 DI GAREJA PE HAPE ADONG DO SIBOLIS

Molo ni sungkun tu hita didia do inganan ni sibolis, alusta mungkin di discotik, di kasino dohot diangka inganan na soding. Hape disude inganan do adong dianggka kantor sikola dohot di gareja hatiha marminggu jolmai, sian dia i berengon idama molo adong CCTV ni gareja.

Tingki marende sada do sude, alai holan masuk sada koor mintor marhusip do nasada tu nasada, holani koor na mulakulak bosan, tumagon ma unang dohot markoor songon hita ate molo sala muse mintor margak do sai hira na adong manggedek.

Masuk paragenda, ah ompe sintuaon apala manjaha do las so boi tingkos didia titik, koma, didia penekanan suara, alama garut tongkin sermon, apala i ulaon na mora doi.Masuk tu tingting markaluaran huhut marisap, na deba paihuthuthon alai sipata marungutungut tu dia do hepengi dipambaen, songoni godang na masuk , Sahat muse ma jamita, panditaonpe dang tingkos marjamita holan namanembahi, sai dirimpu amantaon dope huroha dison japang sitembahon, jamita asa tabo nean begeon adong ilustrasi dohot angka umpama anggoon laos so diboto do mengembanghon jamita i asa tabo begeon ah na asal lulus hian do huroha sian STT on. Bereng ma deba modom ndang parduli aha pe namasa, sai hira holan di gareja do idaon boi nok modom, na asing masisungkunan manghatahatai taringot tu tigatigana .

Ima angka dalan ni sibolis ,digugai do hita asa holan hasomalan parminggoni. Yesaya 59:11 Patungoromon do hita sude, songon angka gompul, jala sai * margogokgogok songon darapati; sai maimaima hita di uhum hasintongan, hape ndang adong; maimaima di hatuaon, hape sai mandao do i sian hita.


27.SIBOLIS JOLMAON

Sai masa do sipata, angka ragam ni hamaolon di keluarga, organisasi dohot na asing. Disada partangiangan lingkungan hea do guntur pas hombar jabu, gabe hurang sonang ma partangiangani. Ala nungga sai ribut situtu, ai nungga dohot dorpi ni jabu mardapar, gabe di tonduri dongan parhalado ma namasai, boasa pola sai gaor hamu, ro alusna i mada amang parhalado nami nasibolison do au nangkin.

Ido amang, unang nean holan jolma boi si bolison, anggo sahalion, tabahen majo sibolis jolmaon, beta tadohoti ma partangiangan on nungga ni paso satongkin asa jolo rodo amang.

Dung simpul partangiangan, adong ma sungkun-sungkun, songon na lambok do hatamuna nangkaning mandok loas ma sahalion jolmaon sibolis aha do maksud ni amang parhalado nami?. Denggan, songon jolma hita tontu adong do masa angka hamaolon, alanani molo pas patunengneng inanta marroha ma amanta lao tuduru, paima satonga jom sip sandiri doi, ai nungga jolmaon be sibolisna, molo amantai do na patunengneng, sip ma inantai lao modom, so sandiri mai,ima goarna jolmaon sibolisi, alai suba jo dialusi inantai,haruar ma jab dohot straight ni amanta asa K.O inantai alias sampe so mangkulingbe ima goar na sibolison ma jolma i do tahe ...? jadi molo so angka persoalan jolmaon ma sibolis.Matius 12:28 Alai anggo Ahu pabalihon angka sibolis i mangasahon Tondi ni Debata, naung songgop ma tahe harajaon ni Debata tu hamu!

28. BENDAHARA NA JUJUR

Mansai marungkil do hita mangalului jolma najujur di hasianganon , sada tingki di sada huria jumpa do hami dohot dongan na jujur toho nasida bendahara ni sada huria. Ala sahali sataon do nabaruon angka verifikasi huria, toho naeng parsirangan ni taon tinotal ma sude pemasukan dohot pengeluaran ni huriai.

Nisungkun ma didia hepeng tai sude, dialusi bendahara ima ndang huantusi amang pandita paretongan muna, sandok nahuboto onma, on ma peleanta bulan januari 6 hali minggu dibuka ma bungkusanna, onma bulan Pebruari 5 hali marminggu di buka bungkusan na asing, songoni ma sahat tu Desember.

Tung jojor do tahe sude, disi dohot lompit ni hepengi, alai deba nungga adong diallangi ngitngit,pelean januari nungga moru Rp.2.300 , ala nungga sega, bulan pebruari moru Rp.1300. dung sun hona total sude uang sataon moruma Rp.7.900. Hape hepeng sataon pelean Rp.32.325 do.

Ringkot do bendahara najujur alai rumingkot dope bendahara na bisuk, dang sae holan jujur. Matius 10:16 Husuru do hamu songon birubiru tu tongatonga ni angka babiat; dibahen i pantas ma hamu marroha songon ulok, huhut lidang ma rohamuna songon darapati!.

29 HOHOS NI JUMARINDANG DOHOT HOHOS NI CIBADUYUT

Mansai tabo do molo tabo jamitai jala hona tu pangkilalaan ni jolma, marjamita ma sada dongan pandita di Bandung. Pas muse baru pinda tusi. Dijamitahon ma taringot tu haunduhon na mar Tuhan.

Dongan sahaporseaon, molomangihuthon Debata ingkon togu do, songon na marhohoson hohos ni Cibaduyut, unang songon hohos ni jumarindang. Ai hohos ni Cibaduyut sian kulit doi gompis jala hot pangkeon, tahan , marasing sian hohos ni Jumarindang, muramura putus, ai sian bayon do i dipatupa, holan satongkin doi tahan, sidung ganti muse.

Dung simpul minggu, didapothon sahalak ruas ma tu ruang konsistori topet mangetong pelean dope angka dongan parhalado, ai didia do jumarindangon amang ninna, imada ndang masuk peta dopei, di kabupaten Dairi Sumatera Utara, disi babi malua dope, jala ndang adong anakhon ni hutai namarsikkola, molo tung pe marsikkola sae ma tammat SR.

Hinsat ma sahalak sian sintua, amang dang songoni dohonon muna taringot tu hutai, ai kebetulan ahu helani hutai do amang, jala tangkas do deba nanidok munai, 12 do jabu disi, alai tiap jabu adong do BA, anakhonna, ndang songon hamu ai sian seminari menengah Theologia do hamu, na non gelar sian SMP do hamu masuk jala 4 taon ma di pendidikan, sabotul na level tammatan SLTA do hamu, huhut ma songon na muruk. Sip do amang pandita ai na mangidoido asini roha hian do ibana tu ruasi, ai molo didok angka na pogos ruas na tininggal honna, aut asi roha ni ruas dison narohana, hape gabe muruk do najumpang idope nasida marjamita disi.

Jala somal do panditaon asal baru pindama sai didok huria napogos na tininggalhonna, ompe hona batuna hansitnai muba ma rohana ate unang holan jamita muba roha jumolo ma angka parjamitai. Psalm7:13 Molo so muba rohaniba, * garutonna ma podangna, * sintahonna ma dohot siorna manuju.



30 MARBEGU DO HAPE SINODE

Sinode ima pesta ni Huria, disima adong panatapan taringot tu Huria tu piga taon panghoasion nanaeng pamasaon,jala laos somal do disi manotophon angka parhobas ni huria di tirket Pusat dohot Distrik.

Dung ro boa boa ni sinode, somalna adong lasniroha nabuni, ai boima jumpang dohot angka dongan,adong tingki mulak tu huta anggo isini sinode do 10 % do ihuthonon.Alani alasan natangkas, las boi do tong pandohan tu ruas taringot tu nanaeng sinode on. Boi ma ro 10 tingket naeng laho dohot mulak, uang saku pe aman tabo ma tahe.

Sian naso pamotoan, hape marsarito do ruas na sada tu nasada, masipaboa na nilehonna angka ruas , habotoan ma pangalaho na sohaposan do hape ala anggo mandok marasiniroha tu napogos malo, porlu diakoni hape ulaulana na soboi do bosibosi hape poroon. Dapot ma na 10 ticket naung hona pangido , 11hon sian huria dohot 10 uang saku molo masa hape sinode.ujungna didok ma marbegu do hape sinodeon, ai ingkon 10 Ticket pesawat asa boi sahat, hape las tu Jerusalem pe iba sae do sada ticket. Ba muba ma nean angka dongan na bisuki ate. Kisah Para Rasul 28:27 Ai nunga pir roha ni bangso on, nunga maol marbinege pinggolnasida; nunga ditutup matanasida, asa unang marnida matanasida, unang marbinege pinggolnasida, unang marbinoto rohanasida, unang muba rohanasida, unang tarpamalum Ahu nasida!"

31. MOLO MARRARA NA MANGAN DILUAR DOI

Guru, sada pandohan na mansai uli, ai nasida do na langsung mangurupi angka jolma marhite angka parsiajaran gabe marbisuk.Sian angka haradeon memang ingkon sude do hita mangargai nasida, nata pe jotjot do taida sipata gabe korban do nasida di angka haporluan ni kebijakan ni angka penguasa.

Di sikola SLTA naung tarbarita, adong do sahalak guru pas patorang kon ilmu biologi, pas bagian ni bulung, di bagas bulung adong do goarna kloropil, jala adong do baba ni suan suanan di bulung, las di bulung do nasida mangalompa angka indahanna, siani di sagihon ma tu sude bagian ni hau. Sandok nata pe uratna mangalului sipanganonna alai di bulung do dilompa, siani tarida ma namasiboan ulaonna sude angka bagian ni bulungi.Sian ido tandaon gabe rata ma bulung ni hau i ima bulung na bagak.

Dung hira adong 45 Minut patorangkon,adong ma sungkun sungkun sian angka sisean , amang guru, adong do sipata sude marrara bulung ni sada suan suanan hape ndang na sega , ngongong masatongkin gurui, alai dialusima ba molo marrara do sude bulungna alai hipas suansuanani berarti na mangan diluar do hau, ndang mangalompa di bulungna.

Gabe tarsonggot ma angka siseani, ndang holan nasida hape na mangan diluar ala mar kost dohot do hape suansuanan pe manganmangan di luar do hape mambayar bulanan. Sahat ma baritai tu kepala singkola didokma boasa mangajar hamu hape ndang jolo diparade hamu dohot denggan. Sip ma gurui.ai natrpaksa hian do ibana guru,ndang na sian ias ni roha ido namambahen gabe so rohana namangajari. Parhalado pe godang do songoni hira natarpaksa ma idaon marsermon, dohot angka ulaon na asing, molo hira naadong do sihirimon amplop sian ulaoni ipe asa diulahon, jala molo soadong marungutungutma mulak tu jabuna ah tong do hape manembahi pandita on. I Tesalonika 4:1 Angkup ni i, ale angka dongan, huelehelek jala huapoi hami ma hamu marhitehite Tuhan Jesus: Lam tang ma hamu marguru tu poda na jinalomuna sian hami taringot tu parange na tama, laho pasauthon lomo ni roha ni Debata, songon naung binahenmuna.

32. RINGKOT NI SIBAGUR DI HURIA

Di deba huria nabalga sai adong dope deba pangantusion na mansai sonson masa. Godang do huria manolak molo ditempathon Guru Huria aha do na masa ?. Di angka parpunguan adong do alasan, molo holan manjaha tingting, marorgan dohot manguluhon partangiangan do sintua pe boi do hape tamba anggaran situtupon ni Huria taringot tu parbalanjoon. Sintong do sidaliani,alani inghon tangkas ma paradeon Guru Huria na adong hataluponna, manghobasi Huria.
Alai lam tubu do roha boasa tutu boi angka namasai. Sada tingki ni dohotan ma sada ulaon pesta ala tarpillit sada dongan sintua gabe Uluan di sada Huria, gabe boi ma botoon, namansai ringkot do hape SIBAGUR ninna angka naroi,sai nirimpu do sibagur na marlapatan bojak hape dipatangkas lapatanna ima sada pandohan na pinapendek do hape pangantusionna ima Sintua baru Guru. Ringkot ni hasangapon do hape sampe sipata gaor Huria alani pemilihan olo sipata gabe jongjong huria naimbaru manang sekte naimbaru asal ma gabe sibagur iba , ido umbahen gabe rope aturan naimbaru hape tong do diangkali gabe mulak ma dikarang sekretaris huria ma muse dipatupa sian Sintua, sidalian laho mampartahanhon hasangapon na rumari do, ndang mangida hasingkopanni ulaon ditongatongani huria . Mardalan di ingananna ma idaon panghobasion ni Huria sai tong ma hot huria secara administrasi 300 KK Sa Ressort jala jiwa 1.000.sian taon tu taon ndang adong na sorang dohot namonding halongangan bolon doi disada huria , dang lam marparbue ala sasintongna so parbue na ringkot , hasangapon ni halakna do.

Manghorhon ma tu Guru Huria, gabe marlumba ma nasida Singkola pandita adong tu STT adong tu Seminarium Sipoholon, ala manghilala nasida hira nahurang diargahon huria nasida natape sian parsamean ni huria do nasida,ndang ringkot ni parbinotoan be naporlu manang panghobasion nalam dumasip sandok asal ma boi persyaratan gabe pandita.Didok ma nasida BEGU, lapatanna bekas guru, ala nungga Pandita nuaeng, lam rarat ma tahe angka sahiti ummaol ubatan sian demam berdarah manang virus, hinorhon ni hasangapon narumari. Bohado hurianta ganup tahe marsahit do..?Rumingkot hasangapon narumar sian parbue ni barita nauli i ? ndaong ra ate Roma 8:28 Alai taboto do, saluhutna do manumpak tu na denggan di angka na marholong ni roha di Debata, angka na jinouna sian tahina hian.Ndang na pinatupa marhite utokhutok ni jolma sambing.

33 PANTE

Mansai uli do tahe angka panghobasion na masa di ombas parpudion, nungga adong pante Asuhan, inganan ni angka nasopot somarama somarina, adong pante sosial/panti rehabilitasi inganani angka jolma siparmahanan, adong pante panti jompo, inganan ni angka namatua, adong muse do pante pijat inganan ni angka namarsahit gonting mai sahat tu pante kosta inganan ni namarsahit huria ala boi disi masidudua.
Naunjojot ro jolma tu panti pijat dohot pantekosta do, alai anggo tu panti jompo antar hurang do jolma ro, ai masuk pe tu pante jompo holan angka natuatua do naso ada keluargana manang nasoparduli anakhonna tu natorasna.

Mangoli ma sahalak ruas ni huria nungga antar tobang, 46 taon ma umurna, holan sahalakna do ianakhon ni natorasna, jala tu halak malayu marhasohotan. laho marhasohotan adong do parjanjian di nasida naso boi antoan ni keluarga ni nadua pihak angka ulaon nasida.

Dung adong marpitu taon nasida marhasohotan jala di pasupasu Tuhan 2 dakdanak di nasida marumur 5 dohot 3 taon ,ro ma surat sian huta paboahon naso sanggup be natorasna mangula, alani manghatai ma nasida na dua, songonon mai, tabahen ma natorastai tu pante jompo ba molo adong tingki boi tingkironta nasida.Tangis do natorasnai dung diboto ingkon tu pante jompo do hape nasida bahenon ni anakna nasasadai alai hinirhon ni naso adongbe habidingan di oloi doi.

3 bulan parjolo ringgas do sahali sabulan ditingkir natorasnai, alai di namangihut olo do sahali 2 manang 3 bulan. Dung hira marumur 5 dohot 7 taon gellengnai, gabe solo ma rohani gellengnai manungkun natorasna. Bapa ise do na di pante jompoi, dialusi ma bapak dohot omakku doi, ima ompungmu. Jadi roma muse sungkunsungkun ni dakdanaki bapak ,oma molo dung matua hamu muse tusi do boanon ate unang repot hami muse mangurus hamu ninna dakdanaki. Sip ma natorasnai diingot ma masa hametmetonna, suda pe artani natorasnai laho pasingkolahon ibana do, ndang diboto arian dohot borngin, ndang diboto mansadi mangula dohot martangiang asa gabe jolma nahasea anakhonnai. Hape dung hasea anakhoni ndang diboto manarihon natorasna, holan alani biarna tamba tingkina mangurus natuatuana, hape tingki dakdanak ibana so hea mabiar natorasna dohot manaruhon hosana pe tahe asal ma mangolu ibana, songon na binahenna tu anakhonna saonari.

Sai mangandungi ma amantai, jala barani ma ibana mandok manang aha pe namasa ingkon dijolona jala urusonna ma natuatuanai sadenggandengganna. Dongan panjaha ido na jotjot masa di ngolunta, uju dakdanak hita sude natoras paturehon gellengna, alai nuaeng bohado, godangan nama jolmai sangap berengon, uju matua natorasna dipatupa gondang, diseat horbo dohot angka ulaon asa hira nasangap, alani bohado adong nean perubahan, molo tu huria adong persepuluhan, sasintongna tu natoras ingkon adongdo perduapuluhan nasilehonon ganup bulan tu natorasta uju mangolu dope, ai ido Debata natarida dingolunta, napatandahon Tuhani tu hita.

Gabe tiruan na argamai di gelengta asa dung matuahita muse boanonna hita tu pante manang pinggirni tao toba laho picknik.Ulangan 4:40 Dibahen i ingkon ramotanmu angka aturanna dohot tonana, angka na hutonahon i tu ho sadarion, asa marhasonangan ho dohot angka anakmu dung salpu ho, jala asa leleng ho mangolu di tano, na nilehon ni Jahowa Debatam tu ho saleleng ho mangolu.


34. BOASA RINGGAS HAMU MARMINGGU DI HKBP

Heado tapatupa sungkunsungkun tu 400 halak ruas ni huria , 100 angka namatua na marumur 65-tuginjang, 100 halak marumur 45-65, 100 halak marumur 30-45 dohot 100 halak 20-30 taon, alusna.

Natuatua 65 taon tuginjang : Sait tabo modom di gareja, molo dijabu manang di hotel, las sangaja pe iba laho modom ndang nok simalolong, hape molo digareja binege ende, koor apalagi jamitai, sai hira na sahat do iba tuhasonangangan lambok jamitai sai hira pel modom na manait simalolong dang holni tahe dung binege jamita dohot do tondiniba mondokhondok, ndang pola adong hira na manonggahi dohot irama na asing datar do sude, tung sonang ma tahe, sajom manang dua jom pe namodomi nungga mintor hira na segar daging na soboi do nean ni tambaan pe balanjo ni panditai 4 hali SK asal ma boi 2 jom na marjamitai asa songon na nia lelengna na modomi, sandok nalaho mondokhondok do hami asa laho marminggu.Ai molo dijabu manjaga pahompu nama ulaon, modom ndang boi guntur do torus, ba usul nean tiap ari ma marminggu di Gareja asa sai adong isterahat nami angka namatua on ninna muse.

Natuatua umur 45-65 : Tabo ma antong na marminggu di HKBP, dang pola didok tepuk tangan ma hita, tangis ma hita sumolsoli dosanta, marpuasa mahita, sae do holan masuk tu gareja hohom, ba jongjong 3 hali sae, muse tangkas do didok alani mangasahon asiniroha do ndang alani burjunta, dohot ulaonta, ba dang sonangi so burjube iba hape tong do tu surgo holan alani asiniroha. Digareja na asing didok persepuluhan, janji iman , hape di HKBP saema holan pelean taon, nilean denggan so ni lean pe ndang pola beha, tongdo dietong iba gabe ruas ni Huria. Alasan na paduahon, ai andingan be patuduon tu natorop nasundat artis hian do iba, dang sanga iba mandohoti Indonesia Idol, ba pinatupa ma koor ba molo digareja ba asal ma kaluar suara nungga didok jago do koorna
Satonga umur 30-45 : Sonang ma antong marminggu di HKBP, boi pajumpang dohot angka Jendral, Pengusaha, Penguasa, dosen , alani naeng manghatai bisnis iba di HKBP ma, ai boi tingki minggui marhusip taringot tu usaha,kenaikan pangkat manng golongan , dang jagaon KPK disi , donghononni jolma tahe ndang mungkin korupsi di gareja ai inganan ni Tuhan do disi. Ima sonang na marminggu di HKBP boi marhusipi patupa angka parhahamarnggion na saling mengisi dohot masipangomoan.

Umur 20-35, nungga pasti tumabo marminggu di HKBP, bebas iba mamillit nanaeng pardijabu, nimasuhan NHKBP songon dalan mangalului pangunsandean.Ndang holan partondion, dohot do pardangingon mangolu disi.Ba binaen ma muse program tu bogor kebaktian padang, persekutuan mudamudi, asa bebas iba pajonok diri tu nahinalungunhon ni roha ndang loja parmisi tu natuatuana ai siapata mansai maol doijin molo nidoklaho mardalni mintor diukur do sian siptu sahat tu jambulan niba muse sai adong do natoras na maol so tarbotoboto ,jala ndang pola adong biaya na tamba isara ni masa nuaeng manonton manang mangan di inganan na antar arga ai sae do dohonon paspasan do biaya sian huria, sandok disima jumpang sirongkap ni badan dohot tondi.

Ia hita angka dongan boasa hita ringgas marminggu tu HKBP ? adong do pandohan mandok II Petrus 1:5 Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i;

36. NUNGGA RO PANDITAI ASA TINANOM

Di angka huria na di indung ni kecamatan, sai boi dope huaso ni huria mangaturhon angka ulaon pesta, marhite huria di daerah Humbang Hasundutan ma rupani diaturhon do mulai andingan jom na namonding tu udean, jom piga mangan sandok boi do sude tahe diantoi huria, boasa boi ala di patupado songon latihan kepemimpinan, parhalado ndang holan di huria, alai dohot do nang di paradatan nasida gabe parhalado na manjaga hbadiaon ni adati gabe dohot mamuji dohot pasangaphon Debata,ndang masa be ruhut hasipelebeguon disi
Dipangke do sada aturan naso tarsurat, molo monding dakdanak,sintua lingkungan ma na aktif disi, molo monding keluarga naposo pandita Ressort ma, alai molo monding natuatua manang sintua praeses ma tusi.

Monding ma sada natuatua, nungga dipastihon hian pukul 13.00 ma mangan natorop, alani ingkon pukul 12 ma masuk acara huria las mamboan na monding tu inganan paradianan parsAtongkinani . Topet pukul 12.00 uso-uso ma parhalado nungga didia paresesta, di uji pandita ma manghubungi nasida, las maralus ma ai ndang jam batak hape pandita nami,somalna molo di batak pukul 12.00 ba gabe topet mai pukul 13.00, ala holan batak do naadong jom na, ima jom batak.

Ribut ma angka panungganei ni ulaoni, disukkun ma sintua lingkungan na toho dohot manuturi pesta, NUNGGA RO PANDITANTAI AMANG ASA TINANOM. Hape dinaroi sungkunsungkun tu sintuai nungga sahat be amanta praeses di inganani. Gabe mabiar ma jala humordit, langan ma bohina, di husiphon ma amang panditanami, mabuk au namarmobili, hamu ma jo paujunghon na mondingi ninna huhut sai dilapma bohina naung mamontari. Dung sun panditai manguluhon acara huria dipatangkasma, boasa mabuk amang praeses nangkin, gabe dihusipma tu panditai, na hubege do nangkin hata di harbangan masukan, naung ro do pandtantai asa tinanom, ido mambahen mabuk au ninna,huida nungga tung mansai muruk bohi nasida. Mengkel ma panditai ai somal do hatai, ndang hamu amang pareses naeng tanomon ninna huhut margak , namondingi do. Gabe maila ma amanta paresesi alani jom bataki, ba jom batak ma tatanom asa jom na nasionali tapangke.

37.SI LATUS MANGIDO HAHEHEON

Dung sar barita jala lam rarat na gabe Kristen di tanoon, demon ma silatus Gubernur nasangapi, di hades di bahen ibana surat pangidoan asa sumuang ibana mangolu, jala asa ditimbangi angka surusuruan pangidoanna, di sungkun surusuruan ni hades ma ibana di jolo ni angka siboto surat las dicatat ma di toruon:

Surusuruan : Boasa marpangidoan ko Latus ingkon mulak
mangolu
Latus : Songonon amang, hubege barita ni Tuhan Jesus
Na mulak mangolu, jala gabe Tuhani do uluan
Muna.Pangidoan ba mulak majo au tu portibi
Asa denggan hutimbangi angka namasai.
Surusuruan : Maksudmu beha huroa.
Latus : Ba molo mulak au tu portibi muba ma au,
huhajongjongkon nama Tuhani, dang mabiar
beau paboaongku ma sasintongna namasai.
Surusuruan : Ba denggan alani hu susun hami ma jo
pangidoan mu tu Tuhan Jesus asa di bahen
haputusan.
Latus : Imatutu, laos paboa hamuma au do gubernur
nasosetuju ingkon parsilngkononna Tuhani.
Surusuruan : Latus nungga ro alus ni Tuhani, on ma
hapustusan sian Tuhani, ni lehon ma ijin tu si Latus mulak tu portibi, paheheon ma ibana di Dusun Jumarindang, Desa Karing kabupaten Dairi.
Latus : Sian dia dalan tusi jala aha jabatanku disi..?
Surusuruan : langsung maho sahat di dolok batu kapur, sian i tuat ma ho hira 3 jom mardalan sahat maho disi adong do 12 jabu disi ima naurrame, ala dusun doi, homa disi kepala dusun.
Latus : Ah dang tingkos bei, sian Gubernur na mangarajai 3 negara gabe kepala dusun, ah dang tohoi, ba molo boi pangidoan nanggo apala Bupati Dairi au manggantihon KRA Jhonny Sitohang, turun sada grade, ndang pola maila iba.
Surusuruan: Namanjaha haputusan do au, ba molo olo ho denggan, soolo ho taon ma disi pagodangku pangidoanmu, na dirimpu ho di hadeson ho gubernur maup.
Latus : Anggo songoni dang olo au bah tu magon ma au dison.
Surusuruan : Ima antong, tingki mangoluho so hea dipingkiri ho manang aha na denggan, dung mate tuntutan mu gok, alani dison pe ho ndang boi di narokko nama ho, ai pa godanghu tuntutanmu keong.Maksudmu hape naeng manganti Syamsul Arifin do, dang boi botul ma ho bojak ranggang, ai hasil pilkada doi gok hepengna ho aha adong.
Latus : Marrara ma bohina, ai ingkon marhepeng nama hape asa boi President, Gubernur, Bupati ndang boi be songon najolo, holan mar IP Tinggi ( Ilmu Penjilatan Tinggi ) hape boi gabe gubernur. Ah pahatop hu do tingkion salpu, gabe manolsoli ma ibana.
Surusuruan.: Boha hamu panjaha namangolu naeng ingot hamu ma II Timotius 2:15 Haringgashon patuduhon haburjuonmi di Debata, songon pangula na so tarila, na padalanhon hata hasintongan i tigortigor, tingki mangolu ma ulahon, unang dung mate manolsolimuse manang menuntut angka situntuton nasomarguna..

38. ISE DO NAUMMORA DISON

Sada diskusi nabalga, dilului ma ise do maummora diportibion, godang do angka pandapot di sagihon ma dison.
Lukas :Anggo au mandok molo naummora di tanoon, ima Bill Gates, komputer na do nasa komputer na di tanoon.Jala artana U$ 2,45 Quardrilliun.
Markus : Anggo pandapothu, ba Liz Taylor do artis termahal didunia,artana sada pulau di antartika, ba molo nietong artana bah nungga suda digit nikalkulator.
Petrus : Ba menurut au si David Beckham do, ima parbolai ai sadia godang mobilna dohot pesawat pribadina, las aha pe naringkot boi tuhoronna.
Maltus : Ima hamu, menurut au Pandita do, boasa hudok songoni......?
Lukas :Interupsi, unang patorus hatami, naloahon do huroha ho, jabuna pe soadong, mobilna pe soadong
Markus :Tutu mai, lam hataan ma pesawat, molo marpesawat pe alani konfrensi luther do ba so hepengna manggarari.
Maltus :Boha nungga boi lanjuthononku, toho do jabu, mobil, so adong,inventaris doi, alai adong do tangkas huboto, nungga adong partapahanna di banua ginjang, molo na pinandohan munai, ba holan di tanoon dopei, naboi meret doi ndang dinasida be.
Petrus :ido ate, idaon do hape sipsip angka panditaon ate,ni tawarhon tano sai didok ndang adong hepeng, nitawarhon na asing sip.
Markus :Patut ma adong huida sada pandita di Parsaoran sipultak apala lerengna pe soada, hape naummargai hape nungga hak milik nasida.Patut ma hape sai anggap enteng iba tu angka panditaon nasalelengon, bayar Yuran pensiun ningon aha baenon tusi garar TLP ningon aha baenon tusi, sai na ngalian ma idaon , hape ido naummora. Ah tahe.martua ma hamu angka panditai, ai adong do hape partapahon muna di banua ginjang.

39 .BREAKING NEWS KIAMAT

Dongan angka na sai tongtong dope mangihuthon siaran, tabege satongkin breaking news sian panitia Kiamat. Dohoton pinabotohon tu sude hamu nasa panonton, hami sude panitia kiamat mangido maaf, nungga sahat hian undangan dohot gokhon nami nainghon 2010 do ari kiamat nanaeng sihalashononta, alai ala adong angka kesalahan tehknis ba jolo marrapot mamuse panitia.
Dihamu dongan ,sabar ma da anggo kiamat tong do ingkon ro holan tingkina haduan ma, bahenon nami ma haputusan na,alai molo adong naso sabar ba boi do masa angka kiamat lokal songon sunami di aceh dohot badai tornado di amerika ba laobema tusi. Sahali nai minta maaf ma hami panitia, tuangka damang dohot dainang, haha anggi dohot napinaribot.

40.TEMBOK JERIKO
Mangajar sikola minggu ma sahalak parsikola pandita toho praktek lapangan di huria Judika. Adong ma sada sungkunsungkun dipatupa tu sikola minggui, hamu angka dakdanak ninna ise do namangarumpakkon tembok Jeriko. Sip ma sude sikkola minggui, asa hira na mandasor dihilala, di sungkun ma muse sahalak, ho ma jo kedan ninna : Mabiar ma dakdanaki huhut tangis dang huboto bapa, ndang au dison do au sian nangkin.

Mangupir ma gurui, didok ma sahali nai antong ise do hamu naumbotosa, sude ma dakdanaki mabiar ndang hami pak, hami pe marminggu do dang adong na tuluar nanggo sada.

Dung simpul di sada partangiangan di minggui, ala somal do dung sun acara masisungkunan angka na ro tu partangiangani adong ma sahalak amanta mandok tu sintua lingkungan namanguluhon partangiangi. Amang sintua, hubege nadiari minggui, marumpak tembok, alani gabe mabiar angka dakdanak, sampe do tangis sahat tu jabu didok ndang nasida mambaheni marumpak, alani adong pangidoan, molo jolma na mangarumpakkon do porlu ba tapasahat ma tu polisi unang gabe dakdanak songgahan muna, molo soi ba asa hatop tabangun muse dipapungu ma toktok ripe asa mintor adong sintuhuna.

Sai sip do amanta sintua i, ai ndang diantusi aha maksud ni amantai, tembok dia namarumpak, alai ninna ma , amang hutampung hami ma usul munai, alani tanda na dohot do hita songon partisipasi parjolo ba dipatupa ma di lingkungantaon Rp.35.000 /KK asa mintor mangihut angka lingkungan na asing ate, dosma rohanta disi. Ai molo tabangun na marumpaki ba ndang pola be sai sulingkiton ise mambahen marumpak huria do hita unang pola sahat tu polisi angka sisongoni.
Dibilut parhobasan di minggu naronai, manghatai ma amanta sintua lingkungani, amang pandita dohot angka dongan sintua nungga dos be rohanami asa tabangun ma tembok namarumpaki, songonpatujolo nion sian lungu nami 30 KK hali Rp.35.000 jumlahna Rp.1.050.000 ma ,las ditingtingkon ma annon. Bingung ma panditai, ai tembok aha marumpak ? disungkun ma sintuai. Ro ma alus ba tembokima.

Roma muse angka sintua na asing toho mai amang, unang antong tembok marumpak gabe sude dakdanak tumatangis nadiari minggui, gabe lam bingung ma panditai. Tembok aha marumpak.? Ninna panditai sahali nai.Jongjong ma parsikola pandita na praktek lapangani, nasongonon doi amang, masuk ahu tu sikola minggu husungkun tu nasida ise mangumpakhon tembok Jeriko , gabe alusna ndang hami , hami pe marminggu do ninna hape gabe adong natangis mabiar.

Ro ma panditai, hope antong aha urusanmu disi ba molo marumpak tembok Jeriko ndang pola sungkunon singkola minggu, cukup do parhalado dohot panitia pembangunan, asa hatop diganti. Mordong ma singkola pandita aha do maksudna tembok Jeriko do marumpak boasa gabe panitia pembangunan sungkunon asa di rehab. Muruk ma panditai ba molo so porlu bangunon boasa pola sungkunon singkola minggu ala sai tangis, asi roha tole denggan mai kaluar minggu manghatai pe hita dohot panitia pembangunan,na asing ma tahatai.

Las loahon ma parsingkola panditai, ndang masiantusan hami ninna rohana, ba bohanamaon ninna rohana, nungga sampe muruk panditai tu ibana ah tahe tembok Jeriko mamboan korban do ho hape......?!Yesaya 28:19 Manang piga hali pe ibana ro, sai na luahononna do hamu, ai ganup sogot do ibana ro, arian dohot borngin tahe, jala hagogotan sambing mambahen antusan hata na binege.

41.NOAAAAAAAAAK
Di sada ruang kuliah teologi, masuk ma dosen baru, jurusan Perjanjian Lama. Kebetulan topik pengantar Perjanjian Lama taringot tu aek na sumar :
Dosen : Adong sungkun sungkun..
Siswa :adong pak, dipatorang bapak nangkaning taringot tu parau ni si noak, boha adong dope angka pinahan naso masuk tu parao i..?
Dosen :Daong nungga singhop sude naganjing dohot nasoganjing.
Siswa :ah adong do pak,naso tarsurat do di Bibel
Dosen :Dang adong ningku sai hira naummalo doho
Siswa : Adong, jala boi buktihonon nuaeng molo porlu
Dosen : Master PL au dah ho calon sarjana dope
Siswa :Bojak bapa ndang masuk tusi, buktina asal roma udan mintor manjoudo bojaki Noaaak Noaaaak, berarti hatiha ro aek nasumar nalupa do sinoak pamasukhon bojaki tu parao ido umbahen sahat tu sadarion sai dijou bojaki si Noak
Dosen :ah namangkarang doho ndang logisi
Siswa :Naso logis bapak do, Nuh sarupa doi dohot Noak, aha ma alasan ni bapak disi, anggo bojak las tu Nederland pe tetap do Noaaak Noaaak ndang gabe muba
Dosen :Antong baen majo penelitian tusi asa boi tirkethui mambuat doktor ate.
Siswa :Olo bapa ( alai dibagas rohana didok ah master latteung nya kau, kalau doktor pun doktor latteung juga tusada itulah kau, tidak tahu kau hilangmu....). Yehezkiel 3:6 Ndada tu torop bangso, angka parhata bobang, manang pardila na hallang, angka na so dapot ho hatanasida antusanmu; atik pe so tu nasida ho husuru, ianggo nasida tangihononna do ho, tung sura.



RONGKOMAN NAPARJOLO MENGKEL NAMARIMPOLA
BETA
Marminggu



NIGURITHON NI Pemuda Kreatif
KATA PENGANTAR : PDT .DR. JAMILIN SIRAIT